Eniga meniga

Það er alltaf gaman að eiga meiri pening en maður heldur, vúhú!

Stóð einmitt í hraðbanka áðan og var að taka út pening fyrir leigunni og prentaði svo út kvittun svona eins og ég geri alltaf. Nei bíddu nú við, þetta var nú eitthvað skrítið. Ég átti allt í einu miklu meiri pening heldur en ég hélt ég ætti, hvað var eiginlega í gangi? Kíkti svo á heimabankann minn og sá að ég hafði fengið ágæta summu útborgaða frá þvottahúsvinnunni sem ég var í í janúar 2007... Say what??? Reyndar á ég inni einhverja orlofspeninga hjá þeim en ég hélt ég þyrfti að senda orlofskortið mitt til þeirra, ma-ma-maður áttar sig ekki á þessu. Ég þarf að reyna að komast til botns í þessu máli.

Svo þennan mánuðinn ætla ég að njóta þess að vera nýríkur Íslendingur. Því ég fékk nefnilega líka, mér að algjörum óvörum, marga og óvænta yfirvinnutíma útborgaða frá Nettó þennan mánuðinn, og ég sem hef ekki tekið að mér auka vakt síðan í október eða eitthvað! Ég spurði yfirmann minn í gær hverju þetta sætti eiginlega, hvort það væri nú búið að troða mér í meira en 100% vinnu án þess að láta mig fatta það... Yfirmaðurinn átti nú engin svör við því, sagði að þetta gætu þess vegna verið yfirvinnutímar frá því í desember eða janúar því árinu er skipt niður í fjögur tímabil. En það getur því miður ekki passað því ég var í fríi hálfan desember og hálfan janúar og lifði á hafragraut fram í mars til þess að rétta fjárhaginn aftur við, en engar aukavaktir hef ég tekið.

Ég ætla að eyða öllu þessu nýtilkomna ríkidæmi mínu í fríhöfninni eftir akkúrat viku og einn dag, ójá!

En jæja, verð að drífa mig, verð að reyna að ná ferskleikanum upp eftir glæsilegt miðvikudagsdjamm í gær, því ég er að fara í mat til tengdamömmu.

Við heyrumst ástarpungarnir mínir! Bestu kveðjur, Anna Banana