Spásserað um bæinn

Ritað mánudaginn þann 5. júní klukkan 18

Ég við Rosenlund kanalinn

Já það er margt skrítið og skemmtilegt sem gerist hér í borg Gautanna! En vá, hvað ég skemmti mér vel, þrátt fyrir að þekkja ekki eina einustu manneskju og vera varla bjargálna á tungumálinu! Ég held það sé ekki hægt að láta sér leiðast hérna, eða a.m.k. ekki yfir sumartímann. Veðrið er náttúrulega búið að vera alveg stórkostlegt og svei mér þá ef ég er ekki bara orðin alveg heví brún! Það skein sól í allan gærdag og það er búið að skína sól í allan dag, hitinn er alveg passlega mikill og varla ský á himni.

Rosenlundkanallinn

En það er margt sem þarf að læra, því þetta er svo allt öðruvísi en Ísland nokkurn tímann. Eða a.m.k. fyrir mig, því ég hef aldrei búið í borg áður. Í gær þegar ég var að ganga um bæinn með Ragnari, þá sagðist hann sjá það á mér að ég væri ekki vön að ganga þar sem svona margt fólk væri. Það sá hann á því að ég gekk alltaf á fólkið eða brussaðist klaufalega framhjá því á meðan hann sjálfur skaut mjöðmunum fimlega í allar áttir og klessti ekki á neinn. (Af hverju hef ég það á tilfinningunni að mamma sé hlægjandi núna...?).

Lifandi tónlist í Brunnsparken

Í Netto, sem er hérna í Odinsgatan (berist fram sem Úðínsgodan), er skilti sem á stendur að allt búðarsnatterí sem bannað. Ég, íslenski Íslendingurinn, hélt að sjálfsögðu strax að það mætti ekki biðja búðarfólkið um að snattast fyrir sig, þ.e. spyrja það hvar maður fyndi klósettpappírinn o.s.frv. Núna, eftir að ég las betur og sá að allt snatterí er tilkynnt til lögreglu, þá giska ég á að búðarsnatterí þýði búðarstuldur.

Hér í Gautaborg gengur fólk yfir göturnar þegar því sýnist svo. Reyndar eru sumsstaðar gangbrautir, en alls ekki allsstaðar og þá gengur fólk bara yfir götuna (tékkar reyndar fyrst á því hvort nokkur bíll sé á leiðinni). Þetta er sko miklu verra en á Akureyri nokkurn tímann! Sjálf reyni ég að passa mig voða vel og reyni að lenda ekki undir neinum sporvagni eða risavöxnum strætó... það yrði nú ljóta klandrið.

Sporvagnamiðstöð Gautaborgar á Drottningtorget

Svenskan er samt öll að koma til hjá mér (eftir tveggja daga dvöl, ha ha) og ég skil þegar fólk í búðum spyr mig hvort ég eigi skiptimynt eða hvort ég vilji eitthvað fleira og svara að sjálfsögðu á minni allra penustu sænsku (ja, nej, tack ska du ha!). Ég skildi líka tungumálið þegar ég þurfti að bíða í rúman klukkutíma á góflinu í röð í bankanum og einhver kall hélt að ég og gaurinn sem sat við hliðina á mér værum kærustupar. Humm.

Ég fyrir framan Central station- spurning um að læra að brosa á sjálfsmyndum?

Og já. Það eru númeravélar gjörsamlega út um allt hérna! Í morgun þegar ég skellti mér í sporvagnamiðstöðina til að spyrjast fyrir um sporvagnakerfið (eftir að hafa ráfað um í villu míns vegar í maaargar mínútur í lestarstöðinni og leitað að sporvögnunum, ha ha ha) þá ætlaði ég að sjálfsögðu að skella mér bara í röðina á eftir næsta manni. En nei, ég komst fljótlega að því að ég átti að taka miða.
Það er líka miðakerfi í Skatteverket. Þegar ég gekk þar inn hélt ég að ég myndi aldrei fatta hvernig þetta virkaði allt saman, skrilljón skilti og skrilljón afgreiðsluborð og skrilljón númer allsstaðar... En að lokum fattaði ég þó að kerfið var sáraeinfalt og fékk ég að lokum afgreiðslu (eftir að hafa tekið "vitlausa gerð" af miðum og farið þar af leiðandi í vitlausa röð því ég skildi ekki alveg hvað stóð á miðavélinni...).
Og það er líka miðakerfi í bankanum, þar sem ég þurfti að bíða í rúman klukkutíma á gólfinu, svaka fín í pilsi og allt. Ha ha. Enda voru líka 56 manns sem voru á undan mér í röðinni! Mér var sagt að þetta væri ekki alltaf svona brjálað, en oft kæmi það þó fyrir. Úff. Bankinn lokaði klukkan 15 en ég fékk ekki afgreiðslu fyrr en um hálffjögur og var þá EIN eftir í bankanum því allir hinir höfðu gefist upp á að bíða. En það var allt í lagi, því þá fékk ég líka alveg brilljant þjónustu, ekkert stress í gangi og svona ;)

Odinsgatan

Maturinn hérna er furðulegur. Í gær keypti ég mér ost og í morgun sá ég að það er elgur utan á umbúðunum. Ef þessi ostur er gerður í elgsmjólk, þá æli ég akkúrat núna! Þess vegna fór ég í dag og keypti mér nýjan ost. Brauðið hérna er líka furðulegt. Það er sett rúgmjöl í gjörsamlega allt brauð og ég borða ekki rúgmjöl. Æ-æ.

Annars fann ég í dag ódýra búð sem heitir HemKöp og er alveg frábær. Þegar ég kom að kassanum og gellan sagði hvað matvörurnar kostuðu, þá sagði ég bara "ursäkta" (afsakið) því ég sá hvergi trúanlega tölu á skjánum og hún endurtók töluna 203,5 krónur. Þá fattaði ég að ég hafði hugsað þetta í vitlausum gjaldmiðli og haldið að hún ætti eftir að ýta á samtalstakkann... Ha ha ha.

Og já. Mér finnst það alveg fáránlega fyndið að afgreiðslufólkið í búðunum hérna skuli bara segja "hej" þegar það býður góðan daginn en ekki "góðan dag". Ha ha.

Held ég segi þetta gott í bili, ég þarf að drífa mig á Nordjobbskrifstofuna og taka þátt í að halda upp á danska þjóðhátíðardaginn...

Hälsningar, Anna Björk